Volkswagen одбележува 75 години од почетокот на сериското производство на легендарниот модел.
VW „Буба“ првично беше создаден како предвоен нацистички проект кој требаше да овозможи моторизација на широките народни маси, но Втората светска војна ги смени приоритетите на автомобилската индустрија.
По капитулацијата на Германија, британските окупациски власти го презедоа управувањето со Volkswagenwerk GmbH.
Фабриката беше сериозно оштетена за време на војната, но беше спасена од целосна пропаст од страна на британската армија, која нарача 20.000 возила. Така се роди Volkswagen Typ 1, многу попознат како Beetle - „Буба“.
Сериското производство на ова возило започна пред 75 години, на 27 декември 1945 година. До крајот на таа година беа направени 55 автомобили, а следната 1946 година, VW го зголеми производството на околу 1.000 возила месечно.
Volkswagen формираше продажна и услужна мрежа во 1947 година, а откако беше исполнета квотата нарачана од британските окупациски сили во Германија, започна извозот на возилата „Буба“.
Во 1949 година, Хајнц Нордхоф, поранешен менаџер на Opel, ја презеде функцијата директор на фабриката, благодарение на што производствените капацитети беа значително зголемени во следната деценија. Веќе во 1955 година, само десет години по почетокот на производството, од фабриката излезе милионитиот автомобил „Буба“.
Останатото е историја. „Буба“ стана најпродаваниот автомобил во светот и ја носеше таа титула долго време, сè додека не ја престигна Toyota Corolla.
Производството се прошири со тек на време и во други земји и континенти, а последниот примерок на моделот „Буба“ е направен во 2003 година во Мексико.
До тогаш беа произведени вкупно 21.529.464 возила, од кои 15,8 милиони во Германија.