Битола во 1905 споредена во Битола во 2021 година (кога беше последниот попис).
На почетокот од минатиот век Битола била град со околу 42.500 жители. Тоа било период кога, како и цела Македонија, била во состав на Отоманското Царство. Воедно, две години по задушувањето на Илинденското востание, кое дало многу борци од Битола и Битолско.
Според Macedonian maps на македонскиот мапер Никола, кој детално ги проучува историските официјални статистики од разни извори, во 1905 година во Битола живееле 35,84% Македонци и биле најголема етничка група во Градот на конзулите.
Втора најголема застапеност биле Турците со 24,67%, а трета Власите со 16,93%.
Значителна бројка имале и Евреите со 12,92% и Ромите со 4,7%, додека сите останати ги имало вкупно 4,94%.
Споредено со денес, односно последниот попис од 2021 година, кој сепак е нецелосен поради бојкотот, во Битола живеат речиси 70 илјади жители од кои 80,8% (55.995 лица) се Македонци. Голема разлика во однос на 1905 година е иселувањето на турското население, кое сега претставува само 1,6%. Во 1905 година во Битола живееле околу 10.500 Турци, а во 2021 попишани биле само 1.115.
Втора најголема етнуичка група во 2021 година во Битола се Ромите со 4,1% (2.862 лица). Власите се 1,4% (1.003 лица), а поради депортацијата на Евреите во Втората светска војна од страна на здружените окупаторски сили на германските нацисти и бугарски фашисти, во Битола денес Евреите се многу мала бројка.
Под групата останати етнички заедници денес спаѓаат 1,7%.
Треба да се напомене дека 6,9% од граѓаните во Битола го бојкотираа пописот во 2021 година и за тие 4.774 лица нема податоци за нивната етничка припадност, а најголемиот дел од нив се претпоставува дека се Македонци.