Азиската банка за инвестиции во инфраструктурата (AIIB) ги суспендираше сите активности поврзани со Русија и Белорусија поради конфликтот во Украина.
Одлуката на AIIB се заканува да ги наруши односите меѓу Кина и Русија, кои се блиски трговски партнери, но чии врски се најдоа во вкрстениот оган на воената операција на Путин во Украина, според Financial Times. Кина е најголемиот акционер во AIIB, банка со седиште во Пекинг, а вчера најави дека ќе „заштити нејзиниот финансиски интегритет“ и ќе го процени влијанието на војната во Украина врз нејзиниот бизнис и економиите на нејзините членки.
Новата развојна банка, кредитор со седиште во Шангај, има многу повеќе пласмани во Русија, а исто така вчера објави дека ќе ги прекине новите трансакции со Русија во светло на случувањата во Украина.
Како најголем акционер во AIIB, Кина поседува 26,5 отсто од гласачките права во таа институција. Русија е трет најголем акционер на банката по Кина и Индија, а во октомври беше објавено дека седмото годишно собрание на AIIB ќе се одржи во Русија.
Околу три отсто од вкупното заемно портфолио на AIIB оди во Русија. Првата инвестиција на таа банка во Русија беше во 2019 година, кога даде заем од 500 милиони долари за еден транспортно и инфраструктурен проект. Минатата година одобри заем од 116 милиони евра за проект за подобрување на здравствениот систем на Белорусија.
