Фудбалерот на Парис Сен Жермен Едисон Кавани после конфликтот со Нејмар имаше и расправија со колега од репрезентацијата, Луис Суарез.
Кавани и Суарез, двајцата главни напаѓачи на Уругвај, имаа вербален конфликт за време на последниот натпревар од квалификациите за Светско првенство против репрезентацијата на Боливија.
Уругвајците си обезбедија пласман на Светското првенство 2018 година во Русија преку триумфот со резултат од 4:2, а Суарез кој три години му беше соиграч на Нејмар во Барса, му дофрлуваше на Кавани кога овој се обиде да дофати тежок волеј, иако на другата статива имаше слободен играч.
Очекувано, веднаш се појавија медиумски наслови дека Бразилецот го свртел големиот пријател против соиграчот од репрезентацијата, а самиот Кавани ги подгреа тие тврдења нешто подоцна, кога „Ел Пистолеро“ постигна погодок.
Додека сите славеа со напаѓачот на Барселона, Кавани сам се упати кон центарот, без реакции на овој погодок.
За потсетување, двете големи ѕвезди на ПСЖ се скараа околу изведување на пенал, за потоа да следи и уште еден конфликт, а сега наводно се смириле.
Меѓутоа, веќе се шпекулира дека 30-годишниот Уругваец на крајот од сезоната ќе ја промени средината, а се уште е непознато каков ќе биде епилогот од кавгата со Суарез.
