Портпаролот на Кремљ, Дмитриј Песков, одби да одговори на новинарско прашање за евентуално затворање на руските граници за да спречи бегство на воено способните луѓе откако е објавена делумна мобилизација за воените потреби во Украина.
Билетите за летови од Русија брзо се распродадоа откако рускиот претседател Владимир Путин нареди итна мобилизација на 300.000 резервисти, пренесе Reuters.
Податоците на Google Trends покажуваат скок во пребарувањата за Aviasales, најпопуларната руска интернет страница за купување авиобилети.
Директните летови од Москва за Истанбул во Турција и Ереван во Ерменија денес се распродадоа, а не се достапни ни линии со меѓуслетувања, покажаа податоците на Aviasales.
Песков пред новинарите изјави дека руската влада „многу брзо“ ќе објави кои категории граѓани ќе бидат изземени од мобилизацијата на резервисти со воено искуство, за служење во Украина.
