Како што пренесуваат бројни угледни медиуми и извори, еден од најдобрите напаѓачи на денешницата, Хари Кејн, постигнал договор со баварскиот гигант.
Кејн (29) од почетокот на преодниот рок се споменува како потенцијално засилување за Реал Мадрид и Баерн, но сѐ уште не се откажал од својот Тотенхем.
Синоќа на адресата на Тотенхем пристигнала првата официјална понуда на Баерн, која гласи 70 милиони евра плус бонуси, но истата веднаш била одбиена, за потоа вечерта двете страни да направат голем исчекор кон реализација на трансферот.
Голем број угледни медиуми, меѓу кои и германски Bild, но и некои британски, објавија дека Кејн постигнал договор со Баерн за платата и други услови.
Кејн е заинтересиран за преселба во Баерн и го стави освојувањето на трофеи пред веројатно соборувањето на рекордот на Алан Ширер како најдобар стрелец на сите времиња во англиската Премиер лига.
Од друга страна, откако Баерн остана без Роберт Левандовски нема голгетер во своите редови. Носењето на Садио Мане се покажа како погрешен потег откако Сенегалецот не само штостигна едвај 7 гола, туку и се караше во соблекувалната.
Останува неизвесно дали челниците на Тотенхем ќе го пуштат Кејн во Баерн. Тие веќе ја одбија понудата од 70 милиони евра, но би можеле да се согласат на секоја наредна бидејќи на Кејн му истекува договорот следното лето и би можел бесплатно да го напушти Северен Лондон.
Во текот на неговата кариера, Кејн стана најдобар стрелец во историјата на Тотенхем, најдобар стрелец во историјата на Англија и втор најдобар стрелец досега во Премиер лигата. Се очекуваше тој наскоро да го собори рекордот на Ширер, но преселбата во Баерн веројатно би значело дека тој рекорд останува недопирлив. Ширер има 260 постигнати голови, додека Кејн има 213. Барем две сезони би му требале за да го престигне.
Кејн од младинец е во Тотенхем, а во првите неколку сезони беше позајмуван за да стекне искуство. Вкупно 10 сезони по ред како е во првиот тим, но не успеа да освои ниту еден трофеј со овој тим. Имаше три шанси, но трипати губеше во финалињата: 2015 и 2021 во Лига купот и 2019 во Лигата на шампионите. Премиер лигата исто така никогаш не ја освои, а најблиску беше во сезоните 2015/2016 и 2016/2017 кога титулата ја загуби од Лестер и Челси.
