Пороен дожд и грмотевици го погодија Лондон и предизвикаа поплави во делови на главниот град на Велика Британија, поради што беа затворени осум метро станици, а две болници побараа од пациентите да не ги користат нивните ургентни центри.
Поплавените болници „Випс Крос“ и „Њухем“ вчера побараа од пациентите да одат во други болници, доколку е можно, додека не ги решат „оперативните проблеми“ предизвикани од поплавата.
Пожарникарите соопштија дека добиле околу 300 повици, главно од населени места каде се поплавени подруми, пренесе BBC.
Голем број улици во главниот град се затворени, вклучувајќи ги тунелот Блеквол, А12 и делови од северната обиколница. Голем метеж беше создаден на другите правци во градот, а осум метро станици се затворени.
Предупредувањето за можна бура и грмотевици е во сила за поголемиот дел од југоистокот на Англија, а во некои области метеоролозите најавија врнежи од 75 до 100 милиметри дожд.
Локалните власти советуваат да не се патува додека не помине невремето.