Петнаесетгодишно момче итно е префрлено во болница откако паднало во несвест во својот дом во Нанинг. Детето претрпело мозочен удар поради кој раката му била парализирана, откако цел месец играл видеоигри и спиел само по два часа дневно.
Како и голем број негови врсници, момчето било затворено дома поради коронавирусот од февруари. Неговите родители на докторите им кажале дека поголем дел од времето го минувал во својата соба, под изговор дека посетува онлајн настава, но подоцна откриле дека и дење и ноќе играл видеоигри.
Според медицински експерти од болницата, тоа било главната причина за мозочен удар кај детето, од кој му е парализирана раката.
Неврологот кој ги вршел испитувањата на родителите им кажал дека ваквата состојба е необична за толку млад човек, но веројатно е предизвикана поради нездравиот животен стил кој момчето го водело во изминатите неколку месеци.
„Главна причина е тоа што имал нередовен распоред на спиење и хранење, бидејќи не одел на училиште. Родителите премногу го толерирале неговото однесување, недостатокот на исхрана и одмор довел до намалена количина на крв и кислород во неговиот мозок и предизвикал мозочен удар“, објаснуваат докторите.
Момчето е во болница, но докторите не можат да кажат дали целосно ќе закрепне и дали воопшто ќе го врати осетот за чувство во левата рака.
