Австралискиот тенисер Ник Кирјос најави повлекување од тенисот ако во 2023 година освои некој од четирите грен слем турнири.
Годинава што изминува беше една од најдобрите во неговата кариера, освои три турнири во парови, а во поединечна конкуренција славеше на турнирот во Вашингтон.
Кирјос повторно не успеа да освои грен слем титула, иако беше најблиску во досегашната кариера. Изгуби од Новак Ѓоковиќ во финалето на Вимлбдон. Сега, 27-годишниот тенисер изјави дека може да стави крај на кариерата ако освои грен слем титула.
„Се надевам ќе освојам некој од грен слем турнирите и потоа ќе се пензионирам. Ме прашавте дали ќе ја продолжам кариерата. Искрено, не знам. Оваа сезона беа потребни многу напорна работа и дисциплина. Штом малку ви тргне подобро, сите сакаат нешто повеќе од вас. Така работите стануваат постресни“, вели Кирјос.
Додаде дека оваа сезона се забавувал и исполнил дел од очекувањата.
Претходно во октомври, 27-годишниот Кирјос исто така истакна дека веројатно нема да игра тенис откако ќе наполни 30 години.
