Австралиецот исткана дека не сака да игра други турнири освен на четирите најдобри.
Австралискиот тенисер Ник Кирјос призна дека му било тешко да го поднесе поразот од Русинот Карен Хачанов во четвртфиналето на УС опен, пренесува „Ројтерс“.
По голема борба Хачанов победи со 3:2 или 7:5, 4:6, 7:5, 6:7 (3:7), 6:4 по сетови.
„За мене беше или да го освојам турнирот или ништо, да бидам искрен, се чувствувам како да сум потфрлил на овој турнир. Грен слемовите се она што е најважно. Сега треба да чекам до Австралија опен, што е поразително, срцето ми се кине... Не само за мене, туку и за сите што знам дека сакаа да победам. Излегов без вистинска енергија, физички не се чувствував одлично на почетокот, а потоа стана подобро како што натпреварот се ближеше до крајот“, рече Кирјос.
Австралискиот тенисер најави дека би можел да настапи на АТП турнирот во Токио на почетокот на октомври.
„Не ми е гајле за ниеден друг турнир освен Грен слем. На слемовите се сеќавате дали сте победиле или изгубиле, на луѓето не им е грижа дали сте напредувале, дали имало четири или пет сета... Секој втор турнир во текот на годината е губење време. Луѓето ве паметат ако играте добро на Грен слемовите“, заврши разочараниот Австралиец со грчко потекло.
