Предводникот на Ливерпул е возбуден што за противник го доби шампионот на Италија, а воедно и смета дека одлуката на УЕФА за повторување на жрепката е правилна.
Ливерпул на првата жрепка за противник го доби австриски Салцбург, а потоа на повторената налета на Интер. Иако сега жрепката не му е поволна, Јирген Клоп сепак не е разочаран, туку е возбуден што ќе игра против „Нераѕурите“.
„Морав да чекам 54 години за прв пат да дојдам на 'Меаца'... а сега ќе биде двапати за три месеци, така да тоа е добра вест! Се разбира, жрепката е тешка, дефинитивно“, вели тој за клупската веб-страница.
Ливерпул во групата беше заедно со Милан кого го совлада со 2:1 во последното коло среде Милано. Сега ќе играат против другиот милански клуб.
„Тие се лидери во Италија; добар тим во добар момент. Ќе видиме како ќе се одвиваат работите до нашата средба во февруари“.
„Санчес и Џеко ги познаваме добро, но Лаутаро е веројатно еден од највозбудливите напаѓачи во светот. Симоне Инѕаги е таму, негова прва сезона, лани беа шампиони, но тоа е патот на Ливерпул - никогаш не е тешок, но секогаш возможен. Така да - ајде да се обидеме“, додава.
„Ова е вистински дуел од Лигата на шампионите, така да сѐ е во ред и едвај чекам да дојдат натпреварите“.
Иако во првата жрепка го доби Салцбург, против кого Ливерпул важеше за голем фаворит, сепак Клоп смета дека одлуката на УЕФА за поништување на таа жрепка е правилна.
„Дефинитивно. Ја гледав жрепката во живо и си помислив 'Не смее да остават вака, нема шанси'. Дефинитивно мораше да се повтори“.