Поради дефект на софтверот кој одредува кој тим со кого може, а со кого не може да се падне, УЕФА одлучи да ја поништи пладневната жрепка и од 15 часот да направи нова.
Иако жрепката не беше прекината и беше направена до крај и покрај очигледниот пропуст, сепак одговорните лица во УЕФА одлучија да ја поништат. За скандалозна причина го сметаат фактот што кога се влечеше противникот на Виљареал беше извлечен Манчестер Јунајтед, кој воопшто не требаше ни да биде во комбинација бидејќи беа во иста група. Потоа кога се влечеше противникот на мадридски Атлетико во комбинација не беше ставен Манчестер Јунајтед, иако требаше, но софтверот веќе го имаше претходно ставено кај Виљареал.
Овие две грешки, за кои од УЕФА велат дека виновник е софтверот, а не Михаел Хезелшверт кој ги редеше топчињата за влечење, ја натераа да ја поништи целата жрепка и да закаже нова, денеска во 15 часот.
Претходно извлечените парови сега не важат. Меси против Роналдо нема да игра, освен ако судбината повторно не ги спои, но за тоа ќе видиме подоцна.
