Без разлика дали „црвените“ од Енфилд ќе ја завршат сезоната со еден, два или ниеден трофеј, Јирген Клоп ќе остане запишан во историјата на Ливерпул преку едно значајно и големо достигнување.
Со победата над Кардиф, вкупно 27. во сезоната, Ливерпул стигна до 88 бода и го подобрија сопствениот рекорд на најголем број бодови во една сезона во Премиер лигата. Претходниот рекорд беше поставен на 86 бода, а беше забележан во сезоната 2008/2009, кога тимот го предводеше Рафаел Бенитез.
Кога пред 10 години Ливерпул стигна до 86 бода, многумина претпоставуваа дека тимот од Енфилд конечно ќе може да му го земе приматот на Манчестер Јунајтед како најдобар тим во Англија. Во тогашниот состав можеа да се најдат имиња како Фернандо Торес, Стивен Џерард, Чаби Алонсо, Хавиер Маскерано и Пепе Реина.
Но, 86-те бода се покажаа како врвот на оваа екипа, која со текот на годините се распадна. Во следните сезони Ливерпул завршуваше двапати на шестата, седмата и осмата позиција, а еднаш беше втор.
Оваа сезона Ливерпул игра фантастично уште од почетокот, и тоа во сите конкуренции. Ривалот во Премиер лигата овојпат е Манчестер Сити, но распоредот до крајот на сезоната ќе им биде отежнат со двомечот против Барселона во рамките на полуфиналето од Лигата на шампионите.
