Фудбалерите на Баер од Леверкузен и Аталанта од Бергамо ќе играат во финалето на Лига Европа откако синоќа се одиграа реванш натпреварите од полуфиналето на ова натпреварување.
Тимот од Леверкузен го собори рекордот кој до синоќа го делеше со Бенфика од 48 натпревари без пораз во сите натпреварувања, па отсега е европски рекордер.
Рома водеше со 2:0 и се чинеше дека е на прагот на голем подвиг, а двата гола ги постигна Леандро Паредес од пенал во 43. и 66. минута. Сепак, „Фармацевтите“ и овој пат беа супериорни и подобри и постигнаа голови вредни за пласман во финалето и рекорд во самиот финиш.
Откако не може да го совладаат расположениот Миле Свилар, во 82. минута Џанлука Манчини си постигна несреќен автогол за 2:1, а во судиското надополнување нововлезениот Јосип Станишиќ израмни и го постави конечниот резултат од 2:2.
Така, „Фармацевтите“ ќе играат во големото финале на Лига Европа каде ќе ги чека Аталанта.
Тимот од Бергамо на домашен терен го победи Олимпик Марсеј со убедливи 3:0 и се пласираше по оние 2:2 во Франција. Стрелци за Аталанта беа Адемола Лукман во 30. минута, Матео Руџери во 52. минута и Ел Билал Туре во 90+5.
Финалето на Лига Европа е закажано за 22 мај на „Авива“ стадионот во Даблин.
