Рускиот претседател Владимир Путин им предложи на борците на Вагнер платеникот Андреј Трошев да ја преземе командата со групата, барем така сугерираат коментарите на Путин за рускиот дневен весник Kommersant.
Се чини дека Путин создаде поделба меѓу постарите борци и водачот на групата, Евгениј Пригожин. Весникот објави за состанокот што го одржал рускиот претседател пет дена по неуспешниот пуч на групата Вагнер во јуни. На средбата присуствувале Пригожин и неколку десетици високи борци на Вагнер, пишува CNN.
Путин за Kommersant изјави дека Вагнер не постои според руските закони, додавајќи дека руската влада ќе ја одреди правната рамка на организацијата. Според весникот, Путин претставил голем број опции за иднината на платениците на Вагнер, меѓу кои и да го направи лидер „Седокосиот“ (Седой), односно Андреј Трошев, но Пригожин одбил.
Војниците на Вагнер „можеа да се соберат само на едно место и да продолжат да служат. Ништо нема да се смени за нив, тие би биле предводени од личноста која им била вистински командант во тој период“, рече Путин.
Весникот наведува дека се работи за командант „Седокосиот“ кој, според Путин, всушност ги водел на украинскиот фронт во последните 16 месеци.
„Многу од командантите на Вагнер кимнаа потврдно кога го кажав тоа. Но Пригожин, кој седеше напред, не го виде тоа и рече дека неговите луѓе не се согласуваат со тоа решение“, рече Путин.
Андреј Трошев е пензиониран руски полковник и основач и извршен директор на групацијата Вагнер, според документите за санкции објавени од Европската Унија и Франција.
Трошев беше началник на штабот на групата Вагнер за време на нејзината претходна операција во Сирија, се додава. Санкциите на ОК од јуни 2022 година, исто така, го идентификуваат Трошев како извршен директор на приватна воена група која „го репресираше цивилното население во Сирија“.
