Samsung и неколку други производители на Android смартфони склучија договори со кои се обврзаа дека апликацијата на Facebook не може да биде избришана од нивните телефони.
Според Bloomberg, договорот вели дека Facebook апликацијата не може да биде избришана од телефоните со Android оперативен систем, туку ќе може само да биде ставена во мирување.
Засега не е објавено колку компании го имаат потпишано овој договор, ниту пак се познати нивните имиња, но помеѓу уредите кои се опфатени со договорот е Samsung Galaxy S8.
Апликацијата која ја активира социјалната мрежа Facebook кај уредите кои се предвидени во договорот ќе доаѓа фабрички инсталирана, како голем дел од апликациите на Google. Обично ваквите апликации важат за „проверени и безбедни“ – нешто што не можеше да се каже за социјалната мрежа во текот на изминатата година.
Според претставниците на Facebook, овој договор е постигнат за да им обезбеди „што подобро искуство“ на корисниците на Android уреди. Тие изјавија дека апликацијата воопшто не собира податоци доколку е неактивна, односно ставена во мирување, па затоа не треба да се крева паника поради задолжителното присуство на истата во смартфоните.
