Владата на Италија размислува да изрече наредба сите спортски натпреварите во наредните 7 денови да се играат зад затворени врати.
Најголемото италијанско дерби е закажано за в недела вечер од 20.45 часот во Торино, но ширењето на корона вирусот во северните делови на Италија веројатно ќе му направат проблем.
Италијанската Влада викендов издаде наредба во регионите Ломбардија, Пиемонт и Венето да не се одржуваат спортски настани поради безбедносни мерки за публиката, односно споречување на епидемија. Натпреварот на Интер со Сампдорија во Милано беше меѓу одложените, а тоа веќе прави проблем во згуснатиот календар на „Нераѕурите“ кои настапуваат на три фронта: Серија А, Копа Италија и Лига Европа.
Одложување на натпреварите и наредниот викенд ќе предизвика хаос во Серија А бидејќи сезоната и онака мора порано да заврши поради Европското првенство. „Натпреварите мора да се играат“, ѝ порачаа челниците на Серија А на Владата на премиерот Џузепе Конте. Поради тоа, италијанската Влада размислува да дозволи одржување на спортски настани, но само без присуство на публика. Од синоќа министерот за спорт Винченцо Спадафора состави работна група која треба да го реши проблемот со спортските натпревари во Италија.
Со оглед на ситуацијата во северните области каде постојано расте бројот на заразени со вирусот Covid-19, голема е веројатноста популарното Дерби д'Италија да се игра пред празен стадион, зад затворени врати.
Тоа нема да биде убава глетка, еден таков натпревар да се игра без расположената италијанска публика, но вонредните здравствени околности во моментов се далеку поважни од калчото.
Натпреварот дефинитивно ќе се игра в недела на „Алијанц“ стадионот во Торино, но со или без публика допрва ќе биде официјално одлучено.