Македонската кошаркарска репрезентација во вториот обид успеа да ја совлада Швајцарија и да се најде на чекор од пласман во мундијалските квалификации.
Откако во првото коло доживеа неочекуван пораз на домашен терен од швајцарските кошаркари со 62:67, репрезентацијата на Македонија овој пат со сигурна и пожртвувана игра дојде до одмазда.
Првата четвртина Македонците ја добија со 18:10, за во втората да ја зголемат разликата и на пауза да заминат со водство од 39:26. Во третата четвртина дојде до мал пад во играта и Швајцарија за 7 поени ја намали разликата на достижни 52:46 со кои се влезе во завршницата.
Во последната четвртина се играше изедначено, што на нашата репрезентација ѝ одговараше бидејќи ја одржуваше разликата. Четвртината заврши 15:15, со што остана и водството на Македонија од 6 поени разлика за конечни 67:61.
Најефикасен на паркетот беше Адем Мекиќ со 16 поени, а поен помалку постигнаа Бојан Трајковски и Швајцарецот Џонатан Казади.
Македонија сега има две победи откако во претходното коло славеше над Словачка со убедливи 69:47.
Табела:
- Македонија 2-1 198:175
- Швајцарија 1-2 184:193
- Словачка 1-1 111:125
Утре за македонските кошаркари е слободен ден, но од 19 часот со салата „Јане Сандански“ се среќаваат Словачка и Швајцарија. Претквалификациите ќе завршат во среда кога во истиот термин и на истото место Македонија ќе игра со Словачка.
Првите две репрезентации од четирите претквалификациски групи ќе обезбедат место во квалификациите за пласман на Мундијалот кој во 2023 ќе се одржи во Индонезија, Јапонија и Филипини.