Поранешниот голгетер на Ливерпул е импресиониран од Шпанецот кој уште на својот прв натпревар ги освоил неговите симпатии.
„Го гледав неговиот настап против Челси минатата недела и можам веднаш да ви кажам дека Тијаго ги има растурено сите уште на првиот тренинг бидејќи сите цело време гледаа како него да му дадат топката“, почнува Питер Крауч говорејќи за The Daily Mail.
„Тој е толку самоуверен со топката што личи како да може да игра дури и по влечки“, на смеа вели Крауч.
„Едноставно за некои засилувања веднаш сфаќате дека се ниво над останатите. Се сеќавам кога Џердан Шаќири постигна хет-трик на неговиот прв тренинг во Стоук играјќи мал фудбал. Останатите се погледнуваа меѓу себе велејќи 'Господе Боже'“.
Питер Крауч играше за Ливерпул од 2005 до 2008 година, а од 2011 до 2019 и за Стоук.
Тијаго Алкантара летниов преоден рок го засили Ливерпул доаѓајќи од Баерн каде играше од 2013 кога се пресели од Барселона.
„Можев да видам сличности помеѓу Тијаго и Шаби Алонсо. Тоа беше во начинот на кој ја примаше топката и како мазно подаваше. Шаби беше прекрасен фудбалер и тој ми падна на памет кога го гледав Тијаго на 'Стемфорд Бриџ'. Знам дека направи пенал, но дали ги видовте тие додавање без да гледа? Имаше толку многу за восхитување во тие 45 минути, едноставно, тој ќе биде важна алка сезонава“, заврши поранешниот голгетер.