Пратеникот од редовите на Левица, Борислав Крмов, најави дека неговата партија ќе го блокира секој закон кој според нив носи бенефит за урбаната мафија на сметка на граѓаните.
„Пратениците на Левица поднесоа вкупно 1.230 амандмани на предлог-измените на Законот за урбанистичко планирање, кој што е многу контроверзен закон. Имено, само до пред година дена беше донесен нов Закон за урбанистичко планирање и сега одеднаш се јави нова потреба за измени, што е многу сомнително“, рече Крмов на прес-конференција која ја одржа по повод вчерашното блокирањето на предлог-измените на Законот за урбанистичко планирање кога неговиот сопартиец Димитар Апасиев со долг говор направи филибастеринг.
„Најголем дел од стручната јавност се сомнева дека тука се работи за олеснета легализација за парцелата кај 'Холидеј Ин', кадешто главниот проблем е усогласување на ДУП со ГУП, т.е. Деталниот урбанистички план со Главниот урбанистички план и меѓу другото, еден од најбитните работи во овој закон е Членот 35 којшто е изменет и сега дозволува тие два плана да не се усогласени, каде што претходно не беше случај“, додаде тој.
Порача и дека само во последните две децении 145 пати се изменувани законите кои што имаат некаква врска со урбанизам и секогаш во штета на граѓаните и на бенефит на урбаната мафија.
