Лакрдија на Копа Америка: Во ВАР цртаа погрешни офсајд линии и не досудија пенал за Бразил

Ноќеска со дербито помеѓу Бразил и Колумбија беше комплетирана групната фаза на Копа Америка, а натпреварот меѓу овие две репрезентации заврши 1:1.

Натпреварот го одбележаа две големи судиски грешки кои ги оштетија двете селекции и за среќа сето тоа не влијаеше на конечниот пласман во групата.

Бразил поведе со голот на Рафиња во 12. минута од натпреварот, а 7 минути подоцна судиите од ВАР собата изрежираа вистински циркус.

Имено, тие решија да го поништат голот на Давинсон Санчес по слободен удар, но при анализирање на ситуацијата со центаршутот исцртаа сосема погрешна линија.

Судиите ја гледаа ногата на Џон Кордоба, наместо Санчес, кој го постигна голот. Кордоба беше во офсајд и затоа голот беше поништен.

Колумбија сепак успеа да израмни во судиското надополнување на првото полувреме, кога Даниел Муњос погоди за 1:1 по асистенцијата на Кордоба.

Неколку минути пред тоа, ВАР уште еднаш потфрли, бидејќи и Бразил беше оштетен со судиската одлука. Винисиус беше соборен во шеснаесетникот, а очигледниот пенал не беше досуден.

Во вториот дел резултатот не се промени и остана 1:1, па Колумбија заврши како прва во групата и во четвртфиналето ќе оди на Панама, додека Бразилците имаат потешка задача и дуел со Уругвај.

За на Бразилците да им биде многу потешко се погрижи Винисиус, нивната прва ѕвезда, кој во 9. минута доби жолт картон и заработи суспензија за четвртфиналето.