Кинески лекар од Вухан кон крајот на декември се обидел да предупреди за корона вирусот, меѓутоа бил замолчен од страна на полицијата, објавија BBC и CNN.
Доктор Ли Венлијанг (34) на 30 декември пуштил порака преку апликацијата WhatsApp дека седум пациенти во болницата во која работи се заразени од вирус сличен на САРС и дека се во карантин.
Тој појаснил дека станува збор за корона вирус кој припаѓа на фамилијата вируси во кои се и тешките акутни респираторни синдроми.
Меѓутоа, во рок од неколку часа неговата порака станала вирална.
– Кога видов дека циркулира, сфатив дека е надвор од моја контрола и дека најверојатно ќе бидам казнет, рече Ли.
За кратко време полицијата на Вухан го обвинила дека шири гласини, а во меѓувреме и тој се заразил и се наоѓа на интензивна нега.
Вирусот кај него е дијагностициран од 1 февруари, а се заразил од пациент кого го лекувал.
Во меѓувреме, добил опомена и од болницата, од каде му било побарано да појасни како знаел за случаите. На 3 јануари бил повикан во полиција на сослушување поради наводно ширење дезинформации, иако на 31 декември била прогласена епидемија на коронавирус.
Доктор Ли бил принуден да потпише изјава во која го признава својот „прекршок“ и во која ветува дека нема да направи нови „незаконски дејства“.
Полицијата досега нема одговорено на прашањата на CNN во врска со тврдењата на доктор Ли.
