Болка во карлицата, обилно менструално крварење и непријатност за време на интимните односи се вообичаени симптоми на ендометриоза.
Сепак, симптомите на оваа болест, која погодува една од 10 жени на репродуктивна возраст во светот, може значително да се разликуваат. Како што пишува The Sun, симптомите може да варираат, од болки во карлицата и замор до проблеми со зачнувањето.
Овој сериозен гинеколошки проблем, кој погодува 176 милиони жени ширум светот, предизвикува раст на ткиво, слично на слузницата на матката, на други места, како што се јајниците и јајцеводите, предизвикувајќи воспалителни процеси и неподнослива болка. Многу жени се борат со години за да добијат точна дијагноза и покрај болката што ги попречува нивните секојдневни задачи.
Може да биде тешко да се дијагностицира ендометриоза бидејќи симптомите може многу да варираат од жена до жена.
„Некои имаат сериозни симптоми, додека други можеби не толку многу. На пример, нивните симптоми често може да бидат слични на класичните менструални болки“, објаснува д-р Бина Мехта и посочува помалку познати симптоми кои исто така често укажуваат на ендометриоза:
- дигестивни проблеми (абдоминална болка, надуеност, запек)
- замор
- чувство на печење или други непријатни чувства при мокрење
- проблеми со зачнувањето
Иако секој од овие симптоми може да биде знак за некои други здравствени проблеми, гинеколозите објаснуваат дека тие често се јавуваат токму кај жени кои имаат недијагностицирана ендометриоза.
