Италијанскиот стратег Фабио Гросо повеќе не е тренер на Лион.
Челниците на Лион решија да му врачат отказ на Гросо откако го водеше тимот на само 7 првенствени натпревари. Францускиот клуб денеска објави соопштение во кое ги информира навивачите дека Пјер Саж ќе биде привремен тренер, а ќе му помагаат Жереми Брешет, Жан-Франсоа Вије и тренерот на голманите Реми Веркутр.
Тоа значи дека заедно со Гросо од Лион заминуваат и неговите соработници Рафаеле Лонго, Франческо Вакариело, Виторио Карело и Мауро Карета.
Гросо го презеде Лион на 16 септември кога го замени Лоран Блан по ужасниот почеток на сезоната во кој тимот падна во зоната за испаѓање благодарение на само едниот освоен бод од првите четири кола.
Првата лигашка победа Гросо ја оствари против Рен пред репрезентативната пауза, но тоа остана негов единствен триумф. На седум натпревари забележа и 2 нерешени и 4 порази.
Италијанецот неславно го напушта францускиот клуб, а ќе остане запаметен и по повредата што ја заработи кога навивачите на Марсеј го каменуваа тимскиот автобус на Лион. Станува збор за исеченици на лицето кои бараа конци.
Лион е последен на табелата со само 7 бодови од 12 одиграни натпревари и заостанува 5 бода зад сигурната зона. До крајот на сезоната во Лиг 1 остануваат уште 22 кола.
