Барселона ја започна сезоната со триумф против Севиља во рамките на шпанскиот Суперкуп а капитенот на екипата, Лионел Меси, со овој трофеј стана најтрофејниот фудбалер во историјата на каталонскиот гигант.
За актуелниот шпански шампион ова беше 13-та титула во Суперкупот и најдобар можен почеток на новата сезона.
Севиља поведе со голот на Пабло Сарабија во деветтата минута, но екипата на Барселона не дозволи да биде изненадена и до крајот на натпреварот со головите на Џерард Пике и Осман Дембеле ја осигура победата во Суперкупот.
Новиот капитен Лионел Меси го освои 33-от трофеј со екипата на Барселона, со што го надмина Андрес Иниеста (32), а зад него останаа Џерард Пике (28), Бускетс (28), Чави (24), Дани Алвес (24) и многу останати. Меси со Барселона освои девет шампионски титули од шпанската лига, осум Суперкупови, шест титули во Кралскиот куп, четири титули од Лигата на шампионите, три Светски клупски првенства и три Европски суперкупови.
Аргентинецот беше назначен за нов капитен на екипата пред почетокот на новата сезона, а веќе во првиот натпревар со капитенската лента тој успеа да се закити со трофеј.
