Лидерите на Франција, Германија и Италија синоќа ја повикаа Србија де факто да го признае Косово, кое прогласи независност во 2008 година, но што Белград сè уште го смета за своја покраина.
Во изјавата објавена еден ден по разговорите со двете страни, францускиот претседател Емануел Макрон, германскиот канцелар Олаф Шолц и италијанската премиерка Џорџа Мелони рекоа дека е време балканските соседи да ги исполнат претходните обврски.
Нивниот потег следи по зголемената меѓународна загриженост дека поранешните воени непријатели би можеле да се вратат во отворен конфликт по серијата насилни инциденти во последните месеци. Голем дел од тензиите се насочени во северно Косово, каде што етничките Срби се мнозинство. Остатокот од Косово е претежно составен од етнички Албанци.
Во нивната изјава, Макрон, Шолц и Мелони ги повторија долгогодишните повици до косовскиот премиер Албин Курти да формира заедница на општини со српско мнозинство на север, давајќи им на локалните Срби одреден степен на самоуправа.
Србија и Косово со години разговараат со посредство на Европската Унија за да ги нормализираат односите. Како што тој процес заглави, лидерите на трите најголеми земји на ЕУ се повеќе се вклучија во обидите за решавање на кризата.
Додека ЕУ претходно бегаше од политички чувствителното прашање за де факто признавање на Косово, тројцата лидери јасно ставија до знаење дека очекуваат Србија да го стори тоа, со што ќе се изврши притисок врз српскиот претседател Александар Вучиќ.
„Го повикуваме Косово да започне процедура за формирање Заедница на општини со српско мнозинство на Косово, како што е пропишано со нацрт-статутот, а Србија де факто да го признае Косово“, се вели во соопштението.
Вучиќ претходно изјави дека ниту формално, ниту неформално нема да го признае Косово.
Но, и Србија и Косово се стремат еден ден да се приклучат на ЕУ, а блокот инсистираше на тоа дека двете земји ќе мора да ги решат своите разлики пред да станат членки.
„Без напредок во нормализирањето на односите, двете страни ризикуваат да пропуштат важни можности“, рекоа тројцата лидери.
