Откако во понеделникот беше објавено дека левиот бек Маркос Алонсо ќе ја напушти Барселона како слободен играч ова лето, сега се чини дека е познато каде ќе оди.
Каталонски Sport пишува дека нов клуб на Алонсо ќе биде Атлетико Мадрид. Со овој трансфер Алонсо би станал само третиот играч во историјата кој играл за сите три клуба од шпанската голема тројка, која ја сочинуваат Реал, Барселона и Атлетико. Заедно со него тоа го постигнаа само Мигел Солер и Бернд Шустер.
Алонсо порасна во Реал Мадрид и одигра еден натпревар за првиот тим, по што играше за Болтон, Сандерленд, Фиорентина и Челси. Тој пред две години како слободен играч пристигна во Барселона од Челси.
Оваа сезона тој е во втор план и на теренот мина само 299 минути. Вкупно, 33-годишниот дефанзивец одигра 44 натпревари за Барселона, последниот во октомври минатата година. Пред него своја шанса добиваат Алехандро Балде и Жоао Кансело.
