УФЦ борачите Конор Мекгрегор и Хабиб Нурмагомедов се големи ривали во октагонот и често се препукуваат на социјалните мрежи.
Сепак, кога станува збор за здравјето и животот, Ирецот ја закопа „воената секира“ и ја покажа неговата сочувствителна страна.
Руските медиуми синоќа објавија дека таткото и менаџер на Хабиб, Абдулманап Нурмагомедов, бил примен во болница во Москва во исклучително тешка состојба и дека е во кома. Прво бил хоспитализиран во родниот Дагестан поради воспаление на белите дробови, а потоа со авион бил префрлен во Москва откако му се јавиле и проблеми со срцето.
Веста стигна и до ирскиот ММА борач, кој го стави на страна ривалството и му упати поддршка на колегата Хабиб.
„Се молам Абдулманап Нурмагомедов да оздрави. Тој човек е заслужен за создавањето на бројни светски шампиони во разни боречки дисциплини. Вистински генијалец за боречки вештини. Многу ме растажи оваа вест. Се молам за семејството Нурмагомедов“, напиша Мекгрегор на Twitter.