Многу често слушаме како најплатените фудбалери во светот заработуваат далеку повеќе отколку што заслужуваат, но контра-аргументот вели дека тие се најдобрите во своето поле и со право заработуваат мултимилионски суми секоја година. Како и секоја година, France Football направи листа на најплатените во светот на фудбалот.
На врвот на листата се најдоа Лионел Меси и Диего Симеоне, кои се најплатениот фудбалер и најплатениот тренер во светот.
Аргентинецот Лионел Меси годишно заработува 130 милиони, а веднаш зад него на листата се наоѓа неговиот некогашен ривал од Ла Лига, Кристијано Роналдо, кој има заработка од 113 милиони на годишно ниво. На третото место се наоѓа поранешниот соиграч на Меси, Бразилецот Нејмар, кој откако пристигна во ПСЖ годишно инкасира по 91,5 милиони евра.
Двете преостанати места во Топ 5 на листата на најплатени ги исполнуваат двајца играчи од Мадрид: Антоан Гризман (Атлетико Мадрид) и Герет Бејл (Реал Мадрид), кои заработуваат 44,5 милиони, односно 40,2 милиони евра.
Помеѓу тренерите, најплатен е Диего Симеоне со заработка од 41,2 милиони евра на годишно ниво. На второто место се наоѓа Жозе Мурињо, кој минатата година (пред да биде отпуштен) во Манчестер Јунајтед заработи 31 милиони евра.
Изненадувањето доаѓа дури на третото место, каде се најде Тјери Анри, кој имаше неуспешна кратка кариера како тренер на Монако, но успеа да заработи 25,5 милиони евра. Четвртопласиран е Пеп Гвардиола (24,1 милиони), а елитната петорка ја надополнува Ернесто Валверде (Барселона), кој заработува 23 милиони евра годишно.
Во женскиот фудбал најплатена е норвешката фудбалерка Ада Хедерберг (Олимпик Лион), кој заработува 400.000 евра годишно, а нејзината колешка од истиот клуб, Амандине Анри, има годишна заработка од 360.000 евра.
