Меси на Мбапе му порачал да одбере „вистински победнички проект“ и му навел два клуба каде го советува да замине.
Лионел Меси веќе си замина од ПСЖ откако потпиша за амбициозниот Интер Мајами. Збогувајќи се со Килјан Мбапе, со кого две години играше во нападот на ПСЖ, му дал совет каде да ја продолжи кариерата, пренесуваат шпанските медиуми.
„Јас би сакал да одиш во Барса“, му рекол Меси, а потоа додал: „Но, ако сакаш да одиш во Мадрид, оди, заслужуваш вистински победнички проект“.
За Мбапе се крена голема прашина уште кога ПСЖ повторно разочарувачки рано испадна од Лигата на шампионите. Јасно е дека Мбапе самиот преферира трансфер во Реал Мадрид, а и од кралскиот клуб имаат потврдено дека се заинтересирани за него. Но, 24-годишниот Французин, од татко Камерунец и мајка Алжирка, има договор со ПСЖ, а парискиот клуб нема намера да го пушти летово, туку напротив, сака долгорочно да го задржи.
Договорот на Мбапе со „Светците“ истекува во јуни 2024 година, а има опција тој да биде продолжен за уште една сезона. Сепак, тешко е за верување дека Мбапе ќе ја активира таа опција бидејќи и тој е премногу разочаран од неуспесите на клубот во европски рамки.
Проблем за негово заминување летово не е само управата на ПСЖ, која не сака да чуе за негова продажба, туку и баснословната цена што заинтересираниуот клуб треба да ја плати. Неговата моментална вредност на Transfermarkt е 180 милиони евра, а ПСЖ за да ги избрка заинтересираните спомнува цена над 200 милиони. Има само два клуба што можат да платат таква отштета, а тоа се Манчестер Сити и Реал Мадрид.
„Граѓаните“ го имаат Холанд и немаат намера да тргнат по Мбапе. Неодамна Пеп Гуардиола изјави и дека нема логика да испратат понуда затоа што играчот „сака да оди во Реал“.
Останува само Реал Мадрид, но не летово, туку наредното. „Кралевите“ веќе потрошија 103 милиони евра на Џуд Белингам од Борусија Дортмунд, па сигурно нема да се впуштат во нова, двојно повисока потрошувачка. Би било беспотребно кога наредното лето Мбапе ќе биде слободен играч...