Светскиот шампион Лионел Меси беше пречекан со шпалир во неговиот Пари Сен-Жермен откако доби пауза до Нова година поради Мундијалот во Катар.
Капитенот на Аргентина не беше во составот на клубот во првите два натпревара по паузата, а ПСЖ без него добро се намачи. Парижаните прво со гол во 90+ го победија Стразбур со 2:1, а пред некој ден загубија со 3:1 од второпласираниот Ланс. Сепак, денеска на тренинг имаше насмеани лица и среќен Меси.
Еден детаљ од тренингот на парижаните на сите им падна в око. Килијан Мбапе, францускиот репрезентативец кој играше против Меси во финалето на Светското првенство, го немаше во шпалирот. Иако Мбапе постигна три гола и беше прецизен во пенал рулетот, сепак тоа не му донесе радост на крајот од финалето.
Веднаш почнаа разно-разни шпекулации зошто Мбапе не бил во шпалирот да го поздрави Меси, но вистината е сосем поинаква.
Имено, Мбапе заедно со соиграчот Ашраф Хакими од пред некој ден се наоѓаат во Њујорк каде присуствуваа и на НБА натпреварот меѓу Бруклин Нетс и Сан Антонио Спарс (139:103). Беа сведоци на дабл-дабл учинокот на Кевин Дурент (25 поени и 11 асистенции) по што направија и фотка за спомен со НБА ѕвездата, а на подарок добија и дресови од Нетс.
Следниот натпревар на ПСЖ е на шести против третолигашот Шатору во рамките на Куп де Франс, натпревар на кој се очекува тимот да настапи со комбиниран состав. Првиот состав се враќа во акција на 11-ти кога во Париз ќе гостува фенерџијата Анжер.
