Играч каков што е Лео Меси секој тренер би го посакал во својот тим, но нема многу фудбалски експерти со кои Меси би сакал да соработува, а со кои досега не работел.
Според неговите зборови, од сите фудбалски тренери најмногу му е жал што никогаш не бил во ист клуб со Жозе Мурињо, а нагласи и дека особено го почитува Алекс Фергусон.
„Ги почитувам сите тренери со кои сум работел и од секој од нив имам научено по нешто корисно, што потоа ми помогна низ кариерата. Сепак, двајца тренери со кои никогаш не сум имал прилика да соработувам, а кои многу ги почитувам се Алекс Фергусон и Жозе Мурињо“, рече Меси, а потоа обајсни.
„Фергусон ме гушкаше и бакнуваше дури и кога го победувавме Манчестер Јунајтед. Тогаш не знаев многу добро англиски, а тој ми зборуваше нешто што не можев да го разберам, но по говорот на неговото тело видов дека е сјајна личност. Што се однесува до Мурињо, за него ме поврзуваат многу анегдоти, секогаш ме смееше. Се сеќевам дека пред едно Ел Класико, додека го водеше Реал Мадрид, ми рече: 'Лео, си облекол погрешна маица и се наоѓаш на погрешната страна на теренот. Оди во соблекувална да се пресоблечеш и придружи му се на Роналдо на загревање'. Навистина ми е жал што никогаш не соработував со него“, раскажа Меси.
Бидејќи Фергусон е во пензија Меси нема повеќе шанса да работи под него, додека Мурињо сѐ уште е во тренерските води и моментално ја води Рома. Шпекулациите велат дека Меси на лето ќе си замине од ПСЖ, но тешко е за верување дека би се преселил во Рома. Од друга страна, пак, исто така е тешко за верување дека Мурињо во блиска иднина ќе седне на клупата на Барселона, каде што шпекулациите велат дека Меси ќе се врати. Како и да е, Меси сѐ уште има фора да соработува со Мурињо, доколку некако им ес поклопат патиштата.
