Фуриозни последни половина час на „Росонерите“ во кои од 0:2 направија 4:2, додека Лацио испушти шанса да се врати во игра за титулата откако загуби на гости кај Лече.
Откако првиот дел заврши без голови, следуваше голеада од шест голови во второто полувреме на натпреварот кој се играше на „Џузепе Меаца“. Кога Адриен Рабјо и Кристијано Роналдо во првите минути од вториот дел донесоа предност од 0:2 за „Старата дама“, дури и навивачите на Милан помислија дека Јуве уште еднаш рутински си обезбеди победа.
Но, потоа сѐ тргна надолу за тимот на Маурицио Сари. Во 62. минута Леонардо Бонучи играше со рака во казнетиот простор, а Златан Ибрахимовиќ од белата точка го совлада Војчјех Шченсни. Четири минути подоцна Ибра асистираше за Франк Кеси кој израмни на 2:2.
Јуве тргна од центарот, ја загуби топката, а контрата на Милан резултираше со пресврт и водство од 3:2 веќе во наредната минута. Стрелец беше Емерсон Леау. Во 80. минута поразот на Јуве го потврди Анте Ребиќ.
Очигледно карантинот на фудбалерите на Лацио не им делувал нималку добро. Синоќа го запишаа третиот пораз во последните 5 натпревари, а претходно цела сезона имаа само 2. И тоа овој пат не загубија од било кој, туку од слабиот Лече, екипа која грчевито со бори за опстанок.
А натпреварот почна добро за Лацио. Поништен гол на Лече со ВАР во 2. минута поради играње со рака, а во 5-тата водство на Лацио преку Фелипе Каиседо.
И потоа пресврт на Лече. Хума Бабакар на половина час игра израмни на 1:1, а во 5. минута од судиското надополнување Марко Манкозу не реализираше пенал за пресврт. Сепак, пресвртот дојде веднаш по паузата кога Фабио Лучони погоди за 2:1, резултат кој остана непроменет до крајот.
Четвртиот сезонски пораз на Јуве значи дека Лацио пропушти колосална шанса да се врати на -4. Сега разликата останува 7 бодови предност за „Бјанконерите“ на 7 кола до крајот. Милан со 49 бодови останува во игра за она 5. место кое води во групите од Лига Европа и за кое се бори со Рома и Наполи. А, пак, Лече со првата победа по 6 посни кола барем за момент излезе од зоната за испаѓање.
