Германскиот напаѓач признава дека моментот од тој натпревар ќе го прогонува вечно бидејќи таа шанса можеше да го смени крајниот резултат.
Томас Милер проговори за решавачкото промашување, шанса која искусниот голгетер успеа некако да не ја реализира. Се случи кратко по голот на Рахим Стерлинг во 75. минута кога Англичаните поведоа. Токму Стерлинг ја загуби тпката во германската половина, Каи Хаверц веднаш одлично го пронајде Милер кој иташе кон англискиот гол непречен од никого. Еден на еден со голманот Џордан Пикфорд, Милер ја испрати топката крај стативата на неверување на германските навивачи.
„Тоа е тоа, еден момент кој засекогаш ќе се вгнезди во моето сеќавање, кој навечер не ми дава да спијам“, пишува Милер на својот Instagram профил.
„Оној момент за кој како фудбалер си работел, си тренирал и си живеел. Оној момент кога од тебе зависи дали ќе го вратиш твојот тим во игра и ќе ѝ донесеш радост на твојата нација“.
„Многу боли тоа што имав шанса и промашив. Боли поради целиот тим, моите соиграчи и тренерот кои веруваа во мене. Но, најмногу боли поради германските навивачи кои дојдоа на стадион да нѐ поддржат и покрај тешката ситуација со пандемијата“.
Германија потоа прими уште еден гол за конечна победа на Англија од 2:0 и елиминација на Германците.