Буковките се едни од ретките месојадни печурки, а имаат свој начин на кој го ловат пленот.
Буковките се јадливи печурки од родот Polyporaceae. Може да се најдат во скоро сите умерени и суптропски шуми, на трупците или листопадни дрвја. Интересен податок е дека за прв пат биле одгледувани во Германија за време на Првата светска војна. И до ден денес останале популарна храна, додека за деликатес се сметаат во јапонската и кинеската кујна. Но, она што малкумина го знаат е дека се едни од ретките месојадни печурки.
Тоа значи дека оваа печурка се храни со цевчести црви и тоа така што претходно ги убива со нервен гас. Мислењето на научниците е дека тоа го прави бидејќи од дрвјата и трулите стебла на кои живее не добива доволно протеини кои ѝ се потребни. Поради тоа развила посебна тактика за преживување која подразбира употреба на топчињата на хифите кои лачат мала количина отров што ги парализира црвите.
За само неколку минути од „нападот“ жртвата умира, а филамент од печурката потоа почнува да продира во трупот на црвот за да го раствори ткивото и да ги собере хранливите материи. Едно ново истражување успеа и да утврди како тие всушност користат нервен гас тип 3-октанон, но и дека неговата успешност во убивањето е толку голема, што сега научниците размислуваат да го употребуваат за заштита на растенија од штетници.
Меѓутоа, тоа не е сѐ кога се во прашање супер-моќите на буковката, бидејќи други студии укажуваат дека таа може да помогне и во пречистувањето на почва загадена со дизел масло, како и да разградува оксо-биоразградливи кеси.