Селекторот на турската репрезентација, италијанскиот стратег Винченцо Монтела, изјави дека е среќен поради пласманот во четвртфиналето на Европското првенство, пренесуваат италијанските медиуми.
Турските фудбалери синоќа во Лајпциг ја совладаа Австрија со 2:1 во осминафиналето.
„До последната минута покажувавме тимски дух. Првпат го видовме на квалификацискиот натпревар за ЕУРО против Хрватска. Потоа се загуби, но сега успеавме да го вратиме. Многу сум среќен за играчите“, изјави италијанскиот стручњак.
Турските фудбалери во четвртфиналето на ЕУРО ќе играат против Холандија.
„Одиме чекор по чекор. Имаме противник чии играчи се борат како лавови. Ќе собереме ментална и физичка енергија и ќе продолжиме по нашиот пат. Овој тим игра со срце. Среќен сум за милионите навивачи кои ги поддржуваат овие момци“, изјави Монтела, кој во септември минатата година ја презеде репрезентацијата на Турција.
Четвртфиналниот натпревар меѓу Турција и Холандија ќе се одигра в сабота, 6 јули, од 21 часот на „Олимпиаштадион“ во Берлин. Директниот пренос ќе биде на МРТ1.
