Скопскиот клуб си ги бара назад парите дадени за учество во сезоната која КФМ ја поништи, а се закани дека доколку не му бидат вратени, ќе следува кривична пријава.
МЗТ ја обвинува Федерацијата за тоа што ја прекина сезоната поради пандемијата со коронавирусот и тоа без да прогласи шампион. Лидер во моментот на прекин беше токму МЗТ, но само два бода пред второпласираниот Работнички.
„Правните застапници на нашиот клуб сметаат дека со одлуката за поништување на сезоната се оштетени нашата, но и сите други прволигашки екипи, на кои им е нанесена голема метеријална штета. МЗТ Скопје Аеродром до средината на март на сметка на КФМ уплати 1,06 милиони денари (нешто повеќе од 17.000 евра), кои бараме да ни бидат вратени од страна на Перо Антиќ и од неговите соработници и тоа во рок од три дена“, велат од клубот.
Доколку пати во наредните три дена не легнат на клупската сметка, МЗТ се закани дека ќе поднесе кривична пријава за измама. Сметаат дека бидејчи првенството не продолжи, нема зошто парите за котизација да не им бидат вратени на клубовите.
„Ако челниците на македонската кошарка во овој рок не ги уплатат на сметката на клубот парите кои ние им ги дадовме за да ја организираат Првата лига, а потоа и да ја завршат според личниот и според интересот на нивните коалициски партнери, тогаш ќе бидеме принудени да изготвиме и да поднесеме пријава за сторени кривични дела. Од Основното Јавно обвинителство ќе побараме да поведе постапка за кривичен прогон против овластеното лице на КФМ, односно против претседателот Перо Антиќ и тоа за кривично дело 'Измама', како и за кривично дело 'Злоупотреба на службена должност'“, известувата од МЗТ.
КФМ претходно го побара мислењето на сите клубови учесници во прекинатото првенство и откако поголемиот дел гласаат за опцијата прекин без прогласување на шампион, КФМ го прифати. Оваа одлука не ја прифаќа клубот од Аеродром.
