Кошаркарите на МЗТ се први полуфиналисти на на завршниот турнир од Купот „Благоја Георгиевски-Буштур“. МЗТ во Битола го победи Гостивар со 91:76.
Кошаркарите на Гостивар против фаворитот успеаја да бидат во игра само во првите 15 минути. На полувреме МЗТ имаше предност 54:40, а патникот во полуфиналето беше познат во средишницата на третиот период кога МЗТ стекна предност од 25 поени.
Харис Делалиќ реализираше 22 поена, по 13 поени постигнаа Дамјан Робев, Ејасу Ворку и Душан Танасковиќ.
Тајрис Вилијамс беше прв стрелец кај Гостивар со 23 поени, а Џејлин Инграм постигна 20.
До крајот на денот ќе бидат одиграни и останатите четвртфинални натпревари: Еуро Никел - Чаир 2030, Работнички - ТФТ Моцарт и Пелистер - Феникс.
