Мауро Икарди има одлични изгледи да остане во Франција – ПСЖ наводно се нестрпливи да ја заменат позајмицата на напаѓачот со договор во јануарскиот преоден рок.
Икарди дојде на позајмица од Интер на последниот ден од летниот трансфер рок, откако сериозно се влошија односите меѓу Аргентинецот и фановите на клубот од Серија А.
Тој е во одлична форма во ПСЖ: постигна седум гола на девет натпревари сезонава и добива речиси двојна плата отколку во Интер.
Со 26 години се чини дека е совршено долгорочно решение за „парижаните“, со оглед на тоа дека на Единсон Кавани му се ближи крајот во ПСЖ, а иднината на Нејмар и Килијан Мбапе во клубот е неизвесна.
ПСЖ има однапред договорена опција да го откупи напаѓачот за 70 милиони евра во јануари, но Ванда Нара, сопругата и менаџерка на Икарди, чека подобри понуди, тврди Tuttosport.
Нара се надева дека ќе добие атрактивни понуди од Јувентус или од Реал Мадрид, па не се брза да даде конечен одговор на понудата на ПСЖ.
Спортскиот директор на ПСЖ Леонардо смета дека Икарди ќе биде совршено дополнување на тимот гледано долгорочно, па голема е веројатноста дека ќе направат сѐ за да ја убедат неодлучната Ванда и да го задржат напаѓачот во своите редови.