Македонската репрезентација за играчи до 21 година оствари очекувана победа на гостувањето кај аутсајдерот во групата, тимот на Фарски Острови.
По несреќниот пораз од Шпанија минатиот четврток, младите „Рисови“ отпатуваа на далечниот север со единствена мисија - да ги освојат трите бода.
Капитенот Милан Ристовски со гол во 16. минута најави дека Македонија е допатувана по победа, а потоа нашите фудбалери имаа уште неколку шанси, но не успеаја да го дуплираат водството пред паузата.
Откако во вториот дел селекторот Благоја Милевски направи четири замени, конечно пристигна вториот гол. Кристијан Ацковски е играчот кој зголеми на 0:2 и тоа точно на 10 минути до крајот.
Сепак, домаќините само 4 минути подоцна се вратија во игра благодарение на голот на Петур Кнудсен. Потоа фудбалерите на Фарските Острови притиснаа барајќи гол за израмнување, но младите Македонци го издржаа налетот и последниот свиреж до дочекаа победнички.
Македонија: Јанков; Антовски, Руфати, Серафимов, Тодороски; Даци (74' Тошевски), Гроздановски (57' Емини), Фазлагиќ (90'+1 Личина); Митровски (74' Ацковски), Ристовски (к), Чурлинов (57' Трапановски).
Сега на табелата Македонија моментално изби на 2. место со 10 бодови, но Израел и Казахстан денеска го играта својот натпревар па табелата може да претрпи промени.
Табела:
- Шпанија 16 10:1
- Македонија 10 12:8
- Израел 8 7:6
- Црна Гора 7 9:8
- Казахстан 7 7:10
- Фарски Острови 3 7:19