Најдобриот шведски кошаркар, Јонас Јеребко, синоќа потпиша за московска ЦСКА, а веќе денеска беше исфрлен од репрезентацијата поради тој потег.
Јеребко (35 год.) е без клуб од јануари минатата година, а реши да потпише договор со ЦСКА до крајот на сезоната во екот на руската инвазија на Украина, што на луѓето во неговата татковина воопшто не им се допадна.
Најдобриот кошаркар во шведската историја поради неговиот потег беше исфрлен од националниот тим.
„Јеребко ја претставува шведската кошарка кога го носи репрезентативниот дрес и разговаравме со него за неговиот потпис со ЦСКА. Тоа директно се коси со шведскиот став за Русија и бевме принудени да ја донесеме оваа одлука“, се вели во соопштението на шведската кошаркарска асоцијација.
Освен што беше исфрлен од репрезентацијата, Јеребко остана и без два спонзора - Vitamin Wella и Nocca.
Јеребко ја започна својата кариера во шведски Борос, а дури 10 години помина во НБА лигата играјќи за Детроит Пистонс, Бостон Селтикс, Јута Џез и Голден Стејт Вориорс.
