Скопје, 25 јули 2020 (МИА) – Министерот за здравство Венко Филипче во објава на Facebook посочува дека процентот на хоспитализирани лица заболени од COVID-19во изминативе две недели е намален за речиси два процентни поени.
„Во изминативе две недели, и покрај благиот раст на активни случаи со COVID-19, процентот на хоспитализирани бележи пад од речиси 2 проценти, односно од 11,5 отсто на 15 јули на 9,7 отсто на 23 јули“, наведува Филипче.
Тој посочува дека во континуитет, процентот на хоспитализирани лица од вкупниот број на активни случаи не надминува повеќе од 12 проценти.
„Да ги почитуваме мерките, да се заштитиме себеси, здравствените работници и да го одржиме нашиот здравствен систем стабилен“, порача министерот Филипче во објавата.
Нови 129 случаи со COVID-19 од 1.535 тестирања беа евидентирани во вчерашниот извештај на Министерството за здравство за изминатите 24 часа. Починаа шест пациенти, пет од Скопје и еден од Струга. Регистрирани се 109 оздравени пациенти.
Најмногу нови случаи се регистрирани во Скопје – 45, Штип – 25, Гостивар и Тетово по девет случаи, Куманово – 7, Битола и Кичево по шест случаи, Струга – пет, Прилеп – четири, Охрид, Кочани и Свети Николе по три случаи, Дебар, Кавадарци, Демир Хисар и Делчево по еден случај.
Од 109 оздравени пациенти, најмногу се во Скопје – 60, Куманово – 7, Штип – 16, Прилеп – 1, Тетово – 12, Велес – 4, Кавадарци – 2, Гостивар – 6, Виница – 1. Досега во земјата се направени вкупно 92.550 тестирања на COVID-19.
Вкупниот број на Ковид дијагностицирани во нашата земја од почетокот на епидемијата изнесува 9.797, бројот на оздравени пациенти е 5.254, на починати е 451, а во моментов бројот на активни случаи во земјата изнесува 4.092.
Надлежните посочуваат дека единствен начин за излез од оваа здравствена криза е задолжително носење маски и одржување физичка дистанца.
