Македонскиот фудбалски репрезентативец Елиф Елмас ќе остане во Наполи, откако италијанскиот прволигаш одбил неколку понуди за неговите услуги од прволигашки гиганти од Германија, Португалија и Англија.
Информацијата денеска ја обелодени Чиро Венерато, новинар на италијански Rai Sport и добар познавач на фудбалскиот трансфер пазар, при гостување во неаполското Radio Kiss Kiss.
Според истиот извор, изминатиот период Наполи категорично одбил понуди во висина од 25 милиони евра, кои пристигнале за македонскиот репрезентативец, од бундеслигашите, Борусија Менхенгладбах и Борусија Дортмунд, како и од премиерлигашот Лидс и португалскиот гигант Бенфика.
– На Елмас му оди многу добро во Наполи. Бенфика, но исто така и Лидс, Борусија Менхенгладбах и Борусија Дортмунд понудија 25 милиони евра за него, но (спортскиот директор Кристијано) Џунтоли одговори дека за тоа нема да се разговора, играчот не оди никаде, тој е наше богатство и останува во Неапол, тврди Венерато.
Елмас ја игра својата втора сезона во дресот на Наполи, откако дојде во италијанскиот прволигаш од редови на Фенербахче за сума од 16 милиони евра.
