Иако односите се заладија во последниве години, САД и Русија продолжуваат да соработуваат во вселената.
Американската вселенска агенција НАСА и рускиот Роскосмос ќе продолжат со заедничките напори за испраќање на екипажи во Меѓународната вселенска станица (МВС). Официјалната потврда дојде од руската агенција, а беше наведено дека партнерството ќе продолжи до крајот на 2025 година.
Оваа соработка вклучува составување екипаж астронаути од различни земји и нивно испраќање во вселената со исто летало. Роскосмос сака секогаш да има барем еден претставник во рускиот дел на МВС и барем еден претставник на НАСА во американскиот дел. Агенцијата додава дека одлуката е донесена со цел „да се одржи доверливоста на МВС во целина“.
Меѓународната вселенска станица е лансирана во 1998 година и е симбол на американско-руската соработка по Студената војна и крајот на „вселенската трка“.
Оваа вест доаѓа откако НАСА во април годинава објави дека Русија ќе остане на МВС до 2028 година. Генералниот директор на Роскосмос, Јуриј Борисов, претходно изјави дека Русија ќе се повлече од МВС по 2024 година и ќе се фокусира на создавање сопствена вселенска станица.
НАСА на различни начини се подготвува за заминувањето на Русија, од повлекување на астронаутите од МВС до изнаоѓање начини за контрола на МВС откако Русија ќе ги отстрани погоните.
Целта на НАСА е да ја задржи МВС во функција најмалку до 2030 година.
