Наставникот Гоце Бумбароски од Прилеп упати јавна порака до сите родители кои на групи низ социјалните мрежи бараат готови, прераскажани лектири за децата.
„Вашите разгалени деца се одраз на Вас, почитувани разгалени родители. Наместо да ги поттикнувате децата да читаат лектири, Вие им ги прераскажувате, уште полошо - барате готово прераскажани... Почит и наклон за исклучоците, верувам дека се во поголем број!“, вели наставникот кој постојано укажува колку е важно децата активно да читаат книги и лектири.
Децата се нашето огледало, а како родители воопшто не им правиме услуга доколку не ги поттикнуваме да читаат. Всушност, за децата тоа би бил голем недостаток понатаму во животот бидејќи ќе бидат навикнати некој друг сè за да прави за нив.
Прашањата од типот дали некој ја има прераскажано лектирата „Девојките на Марко“, „Бегалка“ и слично не се во корист на децата, немојте да мислите дека наставниците не забележуваат дека детето ја нема прочитано лектирата. Со едно прашање можат да ја разоткријат лагата.
Оставете ги децата да ја развиваат фантазијата и да читаат, без изговори дека не сакаат книги. Бидете им вие пример, подобро да ве гледаат вас со книга отколку со телефонот в раце.
Реакцијата на наставникот Бумбароски наиде на голема поддршка во јавноста и отвори и други теми за дискусија.
