Исклучете ги телефонот, телевизорот и светлата пред спиење ако сакате да останете витки. Научниците открија врска помеѓу изложувањето на светлина за време на спиењето и дебелината.
Истражувањето на Универзитетот Нортвестерн во Илиноис следело 552 луѓе на возраст од 63 до 84 години, а резултатите од студијата беа објавени во списанието Sleep.
Иако студијата опфатила само постари луѓе, претходните истражувања покажаа слични ефекти кај помладите генерации.
„Без разлика дали се работи за паметен телефон, телевизор преку ноќ или светлосно загадување во голем град, ние живееме меѓу големиот број вештачки извори на светлина достапни 24 часа на ден“, вели неврологот Минџи Ким, автор на студијата.
Од сите волонтери било побарано да ја следат нивната изложеност на светлина - вклучително и ноќе - една недела. Помалку од половина имале петчасовен мрак, што било шокантно за научниците.
Д-р Ким и колегите потоа проверувале дали учесниците биле дебели, имале дијабетес или имале висок крвен притисок за да откријат каква било поврзаност.
Резултатите покажаа дека 40,7% од луѓето изложени на светлина во период од 5 часа биле дебели, во споредба со 26,7% во групата без изложување на светлина.
Околу 17,8% од групата изложена на светлина имале дијабетес, двојно повеќе од другите (9,8%). Слична е разликата помеѓу групите кога станува збор за стапката на хипертензија.
Разликите биле значајни кога биле земени предвид и другите потенцијални фактори на ризик.
Експертите веруваат дека спиењето со вклучено светло може да го збуни телесниот часовник. Ова може да го наруши нивото на хормоните, што може да предизвика луѓето да јадат повеќе храна. Затоа имаат неколку совети.
Во текот на ноќта користете пригушени црвени светла, кои имаат најмалку ефект на мелатонин. Избегнувајте да гледате во светли екрани два до три часа пред спиење.
Ако работите во ноќна смена или користите многу електронски уреди во текот на ноќта, постојат очила и апликации кои можат да ја филтрираат сината светлина.
Проверете дали поставките на телефонот имаат ноќен режим што автоматски го префрла екранот на потопли бои во период на зајдисонце.
