Државниот инспекторат за локална самоуправа донесе одлука да ги запре решенијата за организирање референдуми во општините за мигрантите на 15 октомври, денот за кога се закажани и локалните избори.
Причина, како што појаснија од Инспекторатот, е член 22 од Законот за локалната самоуправа, според кој, никаде не е наведено дека општините имаат надлежност за мигрантите и за нивното населување во локалната самоуправа. Решенијата се стопирани до произнесување на Уставниот суд, пред кој ќе биде доставена иницијатива за оценување на законитоста.
Како што информира државниот инспектор за локална самоуправа, Рахим Муслиу, решение досега е донесено за 12 општини кои доставиле до Инспекторатот извештај од јавното општинско гласило во кој е објавен референдум, а се очекува да бидат доставени уште две од општините Карпош и Ѓорче Петров.
„На 20 септември Инспекторатот изврши вонреден инспекциски надзор во општините Кочани и Штип, а на 21 септември во Гевгелија, Кавадарци, Неготино и во Велес. Уште шест општини донеле одлука за референдум на локално ниво и го известиле Инспекторатот за објавување. Тоа се Битола, Прилеп, Радовиш, Аеродром, Гази Баба и Охрид, а се очекува вакви известувања да достават и општините Карпош и Ѓорче Петров“, рече Муслиу.
Одлуката ќе биде доставена до Министерството за локална самоуправа, државниот секретар за локална самоуправа и до градоначалниците и советите на 12 засегнати општини, а градоначалниците ќе имаат обврска да ги известат и општинските изборни комисии. Одлуката ќе биде објавена во „Службен весник“, а во наредните три дена и на веб-страницата на Министерството за локална самоуправа.