Случајното откривање на знаци на живот под ледената површина на Антарктикот фрла сомнеж на некои наши претходни сфаќања за критериумите за постоење на живи организми на ладни и далечни планети во нашиот Сончев Систем.
Џејмс Смит и Пол Анкер од проектот British Antarctic Survey направија дупка во ледената плоча Filchner-Ronne со дебелина од 900 метри, за да ја анализираат калта на морското дно. На нивно изненадување, сондата сними карпа во која виреат живи организми.
На снимката се гледаат 16 сунѓери и 22 неидентификувани животни. Ова е првпат да се најдат стационарни форми на живот под ледената покривка на Антарктикот, пишува New Scientist.
„Со право сметавме дека не треба да има живот на овие длабочини“, рече биологот Хав Грифитс од проектот British Antarctic Survey. Грифитс ги анализирал сликите и заклучил дека овие организми најверојатно ќе преживеат со хранливи материи што ги носи водата од -2°С. Но, сè уште не е јасно како овие животни форми преживеале досега од очигледните извори на хранливи материи, со оглед на тоа што оваа плоча е оддалечена 260 километри од отворените води каде што живеат фотосинтетички организми.
Покрај тоа, храната за сунѓерите патувала уште подолго, вели Грифитс. Со оглед на она што го знаеме за океанските струи во областа, се чини дека најблискиот извор на сончева светлина е оддалечен 600 километри.
Сè уште не е јасно дали живите суштества на овие карпи се некои нови видови. Не е познато колку живеат - некои сунѓери на Антарктикот се стари повеќе од 10.000 години. Покрај тоа, сè уште е мистерија колку често се хранат овие организми; еднаш годишно, еднаш на 10 години, па дури и еднаш на сто години.
Ова откритие е значајно затоа што покажува дека животот во најтешките средини на Антарктикот е поприлагодлив и поразновиден отколку што се сметаше порано.
„Ова не се некои гробишта каде има неколку единки, ситуацијата е многу посложена“, рече Грифитс.
Експертите веруваат дека знаењето како овие организми се прилагодиле на живеалиште далеку од извори на храна може да ни помогне да разбереме како животот се развил во период од неколку стотици милиони години кога нашата планета била целосно покриена со мраз.
Студијата наречена Breaking All the Rules: The First Recorded Hard Substrate Sessile Benthic Community Far Beneath an Antarctic Ice Shelf е објавена во списанието Frontiers in Marine Science.