Астероидите сè уште привлекуваат внимание, без разлика на нивната големина и оддалеченост од Земјата. Така, еден од нив ќе мине денес покрај нашата планета.
Изминатиот викенд се појавија извештаи според кои НАСА проценила дека голем астероид наречен 2009 JF1 „веројатно“ ќе ја погоди нашата планета на 6 мај, но за среќа тоа нема да се случи. Научниците направија детална анализа и потврдија дека од тој судир нема ништо, односно дека астероидот ќе мине покрај Земјата.
Споменатиот астероид 2009 JF1 беше на „ризичната листа“ на Европската вселенска агенција бидејќи постоеше шанса 1:4.000 да се судри со Земјата во текот на приближувањето овој месец. Сепак, астероидот е отстранет од групата топ 10 „ризични“ уште во февруари годинава.
Дел од причината за повторната процена е што научниците го изгубија од вид споменатиот астероид кратко по откривањето во 2009 година, што значи дека не можеа да соберат доволно податоци за неговата патека на движење, иако им беше јасно дека ќе биде близу Земјата.
Новите опсервации им овозможија на астрономите повторно да го проценат ризикот.
ЕСА во февруари соопшти дека астероидот 2019 JF1 е спуштен пониско на листата заедно со другите „рутински“ објекти кои претставуваат минимална закана. Новите податоци покажуваат дека сега има 1:1.700.000 шанси астероидот да ја погоди Земјата. Но, тоа не е сè. Големината на астероидот повторно е проценета и откриено е дека станува збор за астероид со големина на училиштен автомобил. Дури и да ја погоди Земјата, таквиот астероид не би претставувал голема грижа.
Иако нема причина за загриженост, оваа „лажна тревога“ сепак го сврти вниманието кон фактот дека светот се уште нема технологија за промена на патувањата на големите астероиди кои би претставувале закана за Земјата. Со сегашната технологија, не би можеле да спречиме таква катастрофа.
Сепак, брзиот развој на технологијата ветува дека ќе бидеме во подобра ситуација за одбрана доколку тоа биде потребно.
