Ерлинг Холанд не запира ниту оваа сезона. Голгетерот на Манчестер Сити во просек постигнува речиси гол по натпревар (19/20), синоќа ја погоди мрежата на Лајпциг и со пресврт најави 100% учинок во групата Г од Лигата на шампионите на УЕФА.
А токму со тој гол, петти сезонава, собори уште еден рекорд во најсилното клупско натпреварување на планетава. Стана играч кој стигнал до бројката од 40 голови со најмалку одиграни натпревари во Лигата на шампионите. На норвешката гол-машина ѝ беа потребни само 35 натпревари за да дојде до оваа бројка.
До синоќа овој епитет го красеше Руд Ван Нистелрој, кому му беа потребни 45 натпревари за да постигне 40 голови. Холанд тоа го стори со дури 10 натпревари помалку.
Понатаму на ова рангирање следуваат Килјан Мбапе (59/40), Лионел Меси (61/40) и Роберт Левандовски (61/40).
Норвешкото чудо има уште неколку значајни достигнувања во Лигата на шампионите на УЕФА:
- најмлад стрелец во Лигата на шампионите (20 години и 231 ден), со 10 гола во сезоната 2020/21;
- најмлад стрелец кој постигнал хет-трик на своето деби во Лигата на шампионите, за Салцбург против Генк на 17 септември 2019 година;
- постигна 5 гола на еден натпревар од ЛШ (Манчестер Сити - Лајпциг 7:0), ова го дели со заедно со Лео Меси и Луис Адриану;
- има највисок просек на голови по натпревар во Лигата на шампионите од 1,14: 35 натпревари - 40 голови.
Минатата сезона, Ерлинг Холанд постигна 52 гола на 53 натпревари за Манчестер Сити, ја освои Лигата на шампионите на УЕФА, Премиер лигата и англискиот ФА Куп.
За жал на лето нема да го гледаме на ЕУРО 2024 во Германија откако Норвешка не успеа да се квалификува. Холанд веќе го пропушти и Мундијалот 2022 во Катар.
